އަލްއުޚްތު އުއްމު ޙަނީން
ރަނާއި ރިއްސާއި މުތް، ޖަވާހިރު ފަދަ ތަކެއްޗަކީ ވަރަށް އަގު ބޮޑު ތަކެއްޗެވެ. އެހެންކަމުން އެތަކެތި ބަހައްޓާނީ ވަރަށް ބޮޑަށް ފޮރުވައި ރައްކާކޮށްފައެވެ. އިސްލާމްދީނުގައި އަންހެނާއަށް ދެވިފައިވާ މަޤާމަކީ މިފަދަ މަޤާމެކެވެ. އިސްލާމްދީން އަންހެންތަކުންނަށް ދީފައިވާ ވަރުގެ މަތީ މަޤާމެއް އަދި އެވަރުގެ އަގުހުރި މަޤާމެއް ދުނިޔޭގެ ހުރިހާ ދީންތައް އެއްކޮށްލިޔަސް ނުދެވޭނެއެވެ.
އިސްލާމްދީނުގައި އަންހެނެއްގެ މިސާލަކީ މުތެއްގެ މިސާލެވެ. އެވަނީ ފޮރުވިގެންނެވެ. ރައްކާތެރި ކުރެވިފައެވެ. ޙިމާޔަތްކުރެވިފައެވެ. އެންމެހާ ލޯތަކާއި އަތްތަކުންނެވެ. އެންމެހާ ފޮށުންތަކާއި ގޯނާކުރުންތަކާއި އިހާނެތި ކުރުންތަކުންނެވެ. އެންމެހާ ގެއްލުންދިނުންތަކާއި ފަޟީޙަތްތަކުންނެވެ. އުޚްތުންގެ ޙިޖާބަކީ މުތް އޮންނަ އިތާގެ މިސާލެވެ. އެމީހުންގެ ޢިއްފަތްތެރިކަމުގެ ރަމްޒަކީ އެއީއެވެ. ޢިއްޒަތްތެރިކަމުގެ އަޞްލަކީ އެއީއެވެ. އިތާގެ ސަބަބުން މުތް ރައްކާތެރިކޮށްދޭފަދައިން ޙިޖާބުގެ ސަބަބުން އަންހެނާ ސަލާމަތްކޮށްދެއެވެ. އަދި މުތުގެ ބޭނުމުގައި ދަހިވެތިވެގެން އަންނަ "ދުޝްމަނުންތަ"ކުގެ ކިބައިން މުތް ސަލާމަތްކޮށްދޭފަދައިން އަންހެނާގެ "ޢިއްފަތްތެރިކަމުގެ" ބޭނުމުގައި އަންނަ "މާބުރު"ތަކާއި "ބަޅިނދު"ތަކުގެ ނުސީދާ "ބެލުން"ތަކާއި "ފިރުމުން"ތަކާއި "ފޮނިބުއިން"ތަކުން ޙިޖާބު އެ މާ ރައްކާތެރިކޮށްދެއެވެ. އެހެންކަމުން ޙިޖާބު މުސްލިމް އަންހެނާ ރައްކާތެރިކޮށް ޙިމާޔަތްދެއެވެ.
.jpg)
No comments:
Post a Comment