ޒަވާޖީ ޙަޔާތުގެ ނައު

އަލްއަޚް މުޙައްމަދު ސިރުޙާން

ސިއްތިފުޅު ވިހެއީ ހުކުރުގައި، ނަންއެކީ ހޮނިހިރުގައޭ، މީހަކާއި ކައިވެނިކުރީ އާދިއްތާގައޭ، ހޯމަ ދުވަހު ބަލިވެއްޖެޔޭ، އަންގާރަދުވަހު ޙާލެއްނެތޭ، ބުދަދުވަހު މަރުވެއްޖެޔޭ، ވަޅުލީ ބުރާސްފަތި ދުވަހުގައޭ." މިއީ އަހަރެމެންގެ ޙަޔާތުގައި ދިމާވާ ތަފާތު ކަންކަމެވެ. މީގެ ތެރެއިން އެންމެ މުހިއްމު ދުވަސްވަރަކީ ކައިވެނީގެ ދުވަސްވަރެވެ. އެދުވަސްވަރަކީ އުފާވެރި ދުވަސްވަރަކަށް ވެއްޖެނަމަ މިދުނިޔަވީ ޙަޔާތް ކާމިޔާބުވީއެވެ.

ކައިވެންޏަކީ ނަބީންނާއި ރަސޫލުންގެ ސުންނަތެކެވެ. އެއީ ﷲ ގެ ހެކިތަކުގެ ތެރެއިން ވާ ހެއްކެކެވެ. މާތް ﷲ ވަޙީ ކުރެއްވިއެވެ.

" وَمِنْ آَيَاتِهِ أَنْ خَلَقَ لَكُمْ مِنْ أَنْفُسِكُمْ أَزْوَاجًا لِتَسْكُنُوا إِلَيْهَا وَجَعَلَ بَيْنَكُمْ مَوَدَّةً وَرَحْمَةً إِنَّ فِي ذَلِكَ لأَََيَاتٍ لِقَوْمٍ يَتَفَكَّرُونَ (سورة الروم :21) "

"ތިޔަބައިމީހުންނަށް ޓަކައި ހަމަ ތިޔަބައިމީހުންގެ ނަފްސުތަކުން އަނބިން ހެއްދެވިކަމީ އެކަލާނގެ ކުޅަދުންވަންތަކަމުގެ ހެކިތަކުގެ ތެރެއިންވާ ކަމެކެވެ. އެއީ ތިޔަބައިމީހުން އެކަނބަލުންގެ ފަރާތުން ހަމަހިމޭންކަން ލިބިގަތުމަށްޓަކައެވެ. އަދި އެކަލާނގެ ތިޔަބައިމީހުންގެ މެދުގައި ލޯތްބާއި އޯގާވެރިކަން ލެއްވެވިއެވެ. ހަމަކަށަވަރުން ފިކުރުހިންގާ ބަޔަކަށް އެކަމުގައި ހެކިތަކެއް ވާކަން ކަށަވަރެވެ."

ޒަވާޖީ ޙަޔާތުގެ ނަވަށް މަރުޙަބާއެވެ. މުޙައްމަދާއި އޭނާގެ ޙަޔާތުގެ ބައިވެރިޔާ ފާތުން އާ ދެމީހުންގެ ކައިވެނީގެ ޙަޔާތުގެ ނައުގެ ދަތުރު ފެށުނީ އެ ދެ މީހުން ކައިވެނި ކުރި ވަޤުތުން ފެށިގެންނެވެ. ކޮންމެ ދަތުރަކަށްވެސް ދަތުރުކުރާނެ އުޅަނދެއް ބޭނުންވެއެވެ. ޝައުޤުވެރިވާ އުޅަނދެއް ހޯދަންޖެހެއެވެ. ކޮންކަހަލަ އުޅަނދެއްތޯ ބަލަންޖެހެއެވެ. މުޙައްމަދުގެ ދެމަފިރީން ކައިވެނި ކުރީ ދެމީހުން ރުހި ޤަބޫލުވެގެންނެވެ. ޝައުޤުވެރިވެގެންނެވެ.

1- ޝައުޤުވެރިވުން

ދެމަފިރީންގެ ދެމެދުގައިވާ ޝައުޤު ވެރިކަމަކީ ޒަވާޖީ ޙަޔާތުގެ ނައުގެ ދަތުރު ފެށުމަށްޓަކައި ބޭނުންވާ ފުރަތަމަ ކަމެވެ. އަޅުގަނޑުމެންގެ ތެރެއިން ގިނަބޭފުޅުންނަށް ދިމާވާ ގޮތަކީ ކައިވެނިކޮށް މާ ގިނަދުވަސްތަކެއް ނުވަނީސް މިދެންނެވި ދެމަފިރީންގެ މެދުގައިވާ ޝައުޤުވެރިކަން ފަނޑުވާން ފަށަނީއެވެ. އެގޮތަށް ފަނޑުވަމުންގޮސް ޝައުޤުވެރިކަން އެކީ ގެއްލިގެން ވެސް ހިނގައިދާނެއެވެ. މިކަމުގެ ސަބަބުން ކައިވެނި ރޫޅިގެން ދަނީވެސް މަދުފަހަރަކު ނޫނެވެ. ކައިވެންނެއްގެ މިސާލަކީ ދިއްލާލެވިފައިވާ ހުޅުކޮޅެއްގެ މިސާލެވެ. އެ ހުޅުކޮޅު ކަނިވަމުން ކަނިވަމުންގޮސް އެއްކޮށް ނިވެނީއެވެ. އާދެ ޒަވާޖީ ޙަޔާތުގެ ނައުތައް ކަނޑުގެ އަޑިއަށް ދަނީއެވެ. ތިބާއަށްވެސް މިގޮތަށް ކަންދިމާވެފައިވުން އެކަށީގެންވެއެވެ. މާބޮޑަށް ފިކުރު ނުކުރައްވާށެވެ. އެއްވެސް ޝަރުޠެއްނެތި ތިމާގެ ޙަޔާތުގެ ބައިވެރިޔާއަށް ޝައުޤުވެރިވާށެވެ. ތިމާގެ ނަފްސާއި މުޚާތަބުކޮށް ބުނާށެވެ. "އަހަރެން އަހަރެންގެ ޙަޔާތުގެ ބައިވެރިޔާއަށް ޝައުޤުވެރިވަމެވެ."

ކޮންމެ ދަތުރަކަށްވެސް ދަތުރުކުރާ މަންޒިލެއް ވާންޖެހެއެވެ. ނުވަތަ މަޤްސަދެއް ވާންޖެހެއެވެ.

2- މަޤްޞަދު

މާތް ﷲ އިންސާނާ ދުނިޔޭގައި ލައްވަވާފައިވަނީ އެއިލާހަށް އަޅުކަން ކުރުމަށް ޓަކައެވެ. ވީމާ އެއިލާހުގެ ރުހިވޮޑިގަތުން ހޯދުމަކީ އަޅުގަނޑުމެންގެ ޙަޔާތުގެ އެންމެ ފުރަތަމަ މަޤްޞަދަށް ހަދަންޖެހެއެވެ. އެފަރާތުގެ ރުހިވޮޑިގަތުން ހޯދުމަށް ތިމާ ކުރާ ކޮންމެ ކަމެއް ވާނީ އަޅުކަމަކަށެވެ. ﷲ ގެ ރުހިވޮޑިގަތުން އަހަރެމެންނަށް ލިބިއްޖެނަމަ އެއިލާހުގެ ރަޙްމަތުގެ ގޮވަތި ސުވަރުގެއަށް އަހަރެމެންނަށް ވާޞިލްވެވޭނެއެވެ. ދެމަފިރިއަކު މިދެންނެވިގޮތަށް ﷲ ރުއްސަވާމަގުގައި ދުނިޔޭގެ ޙަޔާތް ހޭދަކޮށްފިނަމަ އެ ދެމީހުން ސުވަރުގޭގައިވެސް ދެމަފިރިންގެ ގޮތުގައި ﷲ ލައްވަވައެވެ. އަހަރެމެންގެ ކައިވެނީގެ ޙަޔާތުގައި ދިމާވާ މައްސަލަތަކުގެ އަޞްލަކީ ﷲ ނުރުއްސަވާ ގޮތްގޮތަށް އަހަރެމެންނަށް އުޅެވުމެވެ. އަހަރެމެން ކުރާ ހުރިހާ ޢަމަލެއް ﷲ ބައްލަވާވޮޑިގެންވާކަމާއި ބުނާ ހުރިހާ ބަހެއް އައްސަވާވޮޑިގެންވާކަން އަހަރެމެން އަބަދުވެސް ހަނދާންކުރާނަމަ އެއިލާހު ނުރުއްސަވާ އެއްވެސް ކަމެއް އަހަރެމެންނަށް ކުރެވޭނެތޯއެވެ؟

ކޮންމެއަކަސް މުޙައްމަދުގެ ދެމަފިރީން ދަތުރުގެ މަޤްސަދު ކަނޑައަޅައިފިއެވެ. އަދި ދަތުރުގެ މަންޒިލް މަޤްޞޫދާ ހަމައަށް ވާޞިލްވުމަށް ޓަކައި ވަކި މަގެއް ކަނޑައަޅަން ޖެހެއެވެ. މިގޮތުން ދަތުރުކުރާ މަގު ބެލުމަށް ޓަކައި ގެންގުޅޭ ވަޞީލަތަކީ ސަމުގާއެވެ. ސަމުގާގެ ކަށި އަބަދުވެސް ހުއްޓިފައި ހުންނަނީ އުތުރަށެވެ.

3- ސަމުގާ

ދަތުރު ކުރަމުން ދާއިރު ރަނގަޅު މަގުން ކަސިޔާރު ވެގެން ދެވޭކަން އެނގެނީ ސަމުގާ ބެލީމައެވެ. އަހަރެމެންގެ މިޙަޔާތުގައި ރަނގަޅު މަގުދައްކައިދޭ ސަމުގާ އަކީ ކީރިތި ޤުރްއާނާއި ލޮބުވެތި ނަބިއްޔާގެ ސުއްނަތެވެ. ޤުރުއާނާއި ސުއްނަތަށް އެނބުރި ދިޔުމުން އަހަރެމެންނަށް ހައްޤުގެ މަގާ ދުރަށް ދެވިފައިވަނީ ކިހާވަރަކަށްކަން އެނގެއެވެ.

މުޙައްމަދުގެ ދެމަފިރީން ނައުގެ އިންޖީނުގެއަށް ވަދެ އިންޖީނު ބަލާލިއެވެ. އެ އިންޖީނު މަސައްކަތްކުރަނީ ޑީސަލް އަކުން ނުވަތަ ޕެޓްރޯލަކުން ނޫނެވެ. އެއިންޖީނަށް ބޭނުންވާ ތެލަކީ އެނައުގައި ދަތުރުކުރާ ދެމީހުންގެ ދެމެދުގައި އުފެދޭ ލޯތްބެވެ. ދެމީހުންގެ މެދުގައި ލޯބި ވަރުގަދަވެއްޖެނަމަ އިންޖީނު ބާރަށް ހިނގައެވެ. އަދި އޭގެ ސަބަބުން ނައުގެ ދުވެލި ހަލުއިވެއެވެ.

4- ލޯބި

ކައިވެނީގެ ޙަޔާތް އުފާވެރިކަމާއެކު ކުރިއަށް ގެންދިޔުމަށްޓަކައި ބޭނުންވާ އެންމެ މުހިއްމު އެއްޗަކީ ދެމަފިރީންގެ ދެމެދުގައިވާ ވަރުގަދަ ލޯތްބެވެ. ލޯބި ވަރަށް ގިނަ ގޮތްގޮތަށް މީހުން މާނަކޮށް އުޅެއެވެ. " ލޯތްބަކީ އެއީ ދެމަފިރީން އެކަކު އަނެކަކަށް އިޚްލާސްތެރިވުން " މިއީ އަހަރެންނަށް ފެނުނު އެންމެ ރަނގަޅު މާނައެވެ. ތިމާގެ ޒަވާޖީ ޙަޔާތުގެ ބައިވެރިޔާގެ ކުރިމައްޗަށް ގޮސް ލޯބިވާކަން ބަޔާން ކުރާށެވެ. ދުލުންބުނާށެވެ. ދެން އޯގާތެރިވެ ކަމޭހިތާށެވެ.

މުޙައްމަދުގެ ޒަވާޖީ ޙަޔާތުގެ ނައު ދުއްވުމަށްޓަކައި ރިޔާ ބޭނުމެއް ނުކުރެވެ. ރިޔަލަކީ ވައިން ދޯނި ދުއްވުމަށްޓަކައި ބޭނުންކުރާ ވަޞީލަތެކެވެ. އެއީ ދޯނީގެ ބޭރުން އަންނަ އެއްޗެއް ކަމަށް ވާތީއެވެ. އެހެނީ މުޙައްމަދުގެ ދެމަފިރީންގެ ޒަވާޖީ ޙަޔާތުގެ ނައު ދުވަނީ ބޭރުން އަންނަ އެއްޗެއްގެ ސަބަބަކުންނޫނެވެ. މުޖުތަމަޢުގެ ނުފޫޒަކުންނޫނެވެ. ކައިވެނީގެ ޙަޔާތް ކުރިއަށް ދަނީ މުޖުތަމަޢުދެކެ ގަންނަ ލަދަކުން ވެސް ނުމެނޫންމެވެ.

ކޮންމެއަކަސް މުޙައްމަދާއި ފާތުންގެ ނައު ނެރުން ނެރެ ދަތުރު ފަށައިފިއެވެ. ފާތުން ގޮސް ދުރުމި ނެގިއެވެ. ދުރުމި ނަގައި ކުރިމަތީން ފެންނަން އޮތް ރަށާ ދިމާއަށް ބަލާލިއެވެ. މުޅި ޖައްވު ފެނުނީ ރަތްކުލައިގައެވެ. މުހައްމަދު ވެސް ދުރުމި އަޅާލިއެވެ. ތެދެކެވެ. ފެންނަނީ ރަތް ކުލައިގައެވެ. މުޙައްމަދު ދުރުމީގެ ކުރީ ބިއްލޫރިގަނޑު ބަލާލިއެވެ. އޭގައި ހުރީ މަހުލޭ އުނގުޅިފައެވެ. ލޭތައް ފޮހެލުމަށް ފަހުބަލާލިއެވެ. ވަރަށް ސާފުކޮށް އެރަށް ފެންނަން އޮތެވެ.

5- އަނެކާގެ ލޮލުން ބަލާށެވެ.

ތިމާގެ ޙަޔާތުގެ ބައިވެރިޔާ ކަންކަމާމެދު ދެކޭގޮތް ނުވަތަ ޙާލަތު ދެނެގަތުމަށްޓަކައި އެންމެފުރަތަމަ ބައިވެރިޔާ ތަޞައްވަރު ކުރާގޮތް ބަލާށެވެ. މިއީ ކައިވެނީގެ ޙަޔާތް އުފާވެރިކަމާއި އެކު ގެންދިޔުމަށްޓަކައި އެންމެ ބޮޑަށް ސަމާލުވާންޖެހޭ އެއްކަމެވެ.

އަހަރެން އެއްދުވަހަކު މަދީނާގެ ގެއަކަށް ކުރަހައިދޭން ދިޔައީމެވެ. އަހަރެން ދިޔައީ ދިވެހިރާއްޖޭގެ ރީތި މަންޒަރުތައް ދައްކުވައިދޭ ޕޯސްޓުކާޑުތަކެއް ހިފައިގެންނެވެ. އަހަރެން އެ ގޭގެ ވެރިމީހާއަށް އެ ޕޯސްޓުކާޑުތައް ދެއްކީމެވެ. އޭނާ އޭގެތެރެއިން އެންމެ ގަޔާވީ އިރުއޮއްސޭ މަންޒަރާއެވެ. އެގެއެއްގައި ކުރަހާނީ އެގެއެއްގެ ވެރިމީހާއަށް ރީތިއެއްޗެކެވެ. އޭނަގެ ލޮލަށް ރީތި މަންޒަރެކެވެ. އަޅުގަނޑަކަށް އެގޭގައި ކުރަހާނެ އެއްޗަކާ މެދު މާގިނައިރަކު ވިސްނާކަށް ނުޖެހުނެވެ.

އަދި އެއްދުވަހަކު އަހަރެން ރެސްޓޯރަންޓަކަށް ދިޔައީމެވެ. އަހަރެންނަށް ޚިދުމަތް ކޮށްދޭން އައީ ބަނގްލަދޭޝްގެ ވޭޓަރެކެވެ. ނަމާއި ރަށާ، އޭނާ ޝައުޤުވެރިވާ މިފަދަ ސުވާލުތަކާއި ވާހަކަތައް އަހަރެން އޭނައާ ދެއްކީމެވެ. އޭނާ ވަރަށް ޝައުޤުވެރިކަމާއެކު އަޑުއެހިއެވެ. އަދި އަހަރެންނަށް އޭނާގެ ޚަރަދުގައި ކޮފީ އަކަށް ދަޢުވަތުވެސް ދިނެވެ.

ކޮންމެއަކަސް މުޙައްމަދުގެ ނައު ކަނޑުގައި ދަތުރުކުރަމުން ދެއެވެ. މުޙައްމަދު މާސިންގާ ކަނޑަށް ނަޒަރު ހިންގާލިއެވެ. މުޙައްމަދުގެ ނަޒަރުގޮސް ހުއްޓުނީ މާވަހަރެއް ކަހަލަ އެއްޗަކާ ދިމާލަށެވެ. އޭނާ ނަވަށް އެއެއްޗެއް ނެގިއެވެ. އަސްތާ! އެއީ މާވަހަރެކެވެ. މާވަހަރަކީ މަހެއްގެބަނޑުން ނުކުންނަ އެއްޗެކެވެ. އެމަހަށް އެއީ އެއްވެސް އަގެއްހުންނަ އެއްޗެއް ކަމަކަށް ނުވެއެވެ. އެކަމަކު އިންސާނުންނަށް އެއީ ވަރަށް އަގު ހުރި އެއްޗެކެވެ.

6- އަގު ވަޒަންކުރުން

މީހަކު ތިމާއަށް ކޮށްދޭ ކިތަންމެ ކުޑަ ކަމެއްގެވެސް އަގުވަޒަންކުރާށެވެ. ތިމާއާއި އެމީހާގެ ގުޅުން އިތުރަށް ބަދަހިވާނެވެ. ދެމަފިރީން އެކަކު އަނެކެއްގެ އަގުވަޒަން ނުކުރުން އެއީ ކައިވެނިތައް ރޫޅި ކައިވެނީގެ ކަވާސާ ގޮއްތައް މޮހޭ އެންމެ ބޮޑު އެއްސަބަބެވެ.

އަހަރެންގެ ރައްޓެއްސަކު އޭނަގެ އަނބިމީހާ ގޮވައިގެން ބޭރު ޤައުމަކަށް އަނބިމީހާގެ ލޮލުގެ އޮޕަރޭޝަނެއް ކުރުމަށްގޮސްފައި އައިސް އަހަރެންނަށް ފޯނުކުރިއެވެ. އަހަރެމެން ރަޙުމަތްތެރިކަމުގެ އެކި ވާހަކަތައް ދެއްކީމެވެ. އަދި އޭނައަށް އެދަތުރުން ވަރަށް ޢިބުރަތްތެރި ފިލާވަޅެއް ލިބުނުކަމަށް ބުންޏެވެ. އޭނަގެ އަންހެނުންގެ އޮޕަރޭޝަނަށް ގާތްގަނޑަކަށް ދެހާސް އެމެރިކާ ޑޮލަރު ޚަރަދުވިއެވެ. އަންހެނުންގެ ގާތު އެއީ މުޅިންވެސް އޭނާއަށްޓަކައި ކުރާ ޚަރަދު ކަމަށް ވެސް ބުންޏެވެ. އޮޕަރޭޝަން ކުރިދުވަސްކޮޅު ދަރިފުޅުބަލަން ޖެހުނީ އަހަރެންގެ ރަޙުމަތްތެރިޔާއަށެވެ. އޭނާއަށް އަންހެނުން އުފުލާ ބުރަ މައްސޫލިއްޔަތު އިޙްސާސް ކުރެވުނެވެ.

އަންހެނަކު، ނަފްސު ތަރުބިއްޔަތު ކުރާ ކޯހެއްގައި ބައިވެރިވިއެވެ. ރަނގަޅު އަންބަކަށް ވުމަށްޓަކައެވެ. އެހެން ކަމުން ރަނގަޅު އަންބަކަށް ވުމަށްޓަކައި އޭނާ އިޞްލާޙްކުރަންޖެހޭ ހަ ސިފައެއް ބަޔާން ކޮށްދިނުމަށް ފިރިމީހާގެ ކިބައިން އެދުނެވެ. އަނބިމީހާ ރަނގަޅު ކުރަންޖެހޭ އެތައްކަމެއް ހުއްޓެވެ. އެކަމަކު ފިރިމީހާ ކަންތައްކުރީ މުޅީން ތަފާތު ގޮތަކަށެވެ. އަނެއްދުވަހު ހެނދުނު ވިސްނާލާފައި ޖަވާބު ދޭނެކަމުގައި ބުންޏެވެ. ފިރިމީހާ އެދުވަހު ވަރަށް އަވަހަށް ހޭލިއެވެ. އަދި ހަ ފިނިފެންމާ ކުޑަ ނޯޓަކާއި އެކު އަނބިމީހާއަށް ފޮނުވިއެވެ. ނޯޓުގައި ލިޔެފައި އޮތީ "އަހަރެންނަކަށް، ކަލާ ގެ ކިބައިގައި ރަނގަޅު ކުރަންޖެހޭ އެއްވެސް ސިފައެއް ހުރިކަމަކަށް ނުފެނެއެވެ. އަދި ކަލާ މިހާރު ތިޔަހުރި ޙާލަތަށް އަހަރެން ކަލާދެކެ ލޯބިވަމެވެ." އެދުވަހު ހަވީރު ފިރިމީހާއަށް ގެއިން މަރުހަބާކީ ކާކުތޯއެވެ؟ ތިޔަހީވީ ރަނގަޅަށެވެ. ފިރިމީހާއަށް މަރުޙަބާ ކިޔުމަށް ޓަކައި ދެލޮލުން އުފާވެރި ކަމުގެ ކަރުނަ އޮހޮރޭ ޙާލު، ގޭ ދޮރުމަތީ ހުރީ ލޯބިވާ އަނބީމީހާއެވެ.

ތިބާގެ ކައިވެނީގެ ޙަޔާތް ބާއްޖަވެރި ކުރުމަށްޓަކައި ކެތްތެރިކަމާއި ޢަޒުމުގައި، ހިތްވަރާއެކު މަސައްކަތް ކުރާށެވެ. ބައެއްފަހަރު މިކަހަލަ ގޮތަކަށްވެސް ކަންތައް ދިމާ ވެދާނެއެވެ. " ކަލާ ހަނދަށް ވުރެ ރީއްޗެވެ " މި ޖުމްލައަކީ ޙަޔާތުގެ ބައިވެރިޔާއާ ދިމާލަށް ބުނެފި ނަމަ ވަރަށް އުފާވާ ޖުމްލައެކެވެ. މިގޮތުން :-

މީހަކު އޭނާގެ އަނބިމީހާގެ ރީތިކަން އޭނާގެ އަނބިމީހާއަށް ބަޔާން ކުރުމަށްޓަކައި ހަނދުވަރުދޭ ރެއެއްގައި އަނބިމީހާ އެކު އަތިރިމައްޗަށް ނުކުތެވެ. ހަނދަށް ބަލައިލާފައި ފިރިމީހާ އަނބިމީހާއަށް ބުންޏެވެ. އެހެރަ ފެންނަ ރީތި ހަނދު ފެނޭހެއްޔެވެ؟ އަނބިމީހާ ޖަވާބު ދިނެވެ. " ކަލޭ ހީކުރީ އަހަރެން އަނދިރި ކަމަށްހެއްޔެވެ؟ "

މިފަދަ ކަންތައްތައް ތިމާއަށް ކުރިމަތިވިޔަސް ކެތްތެރިކަމާއި ހިތްވަރާއި އެކު ކުރިޔަށް ދާށެވެ. ހަނދަށްވުރެ އޭނާ ރީތިކަމަށް ބުނާށެވެ.

ކޮންމެއަކަސް މުޙައްމަދުގެ ނައު އެލިބުނު މާވަހަރާއެކު ދަތުރުކުރަމުން ދެއެވެ. މުޙައްމަދު ހުރީ ލައިގެން ކާނެ އެއްޗެއް ލިބޭތޯ ނަނު އެއްލައިގެންނެވެ. މާގިނައިރުތަކެއް ނުވަނީސް މަހެއް ބޭނިއްޖެއެވެ. މަސްނަގައި ނަވަށް ލިއެވެ. މުޙައްމަދު މަހަށް ބަލަހައްޓައިގެން ހުއްޓެވެ. އޭނާގެ ހިތަށް އެރިއެވެ. މަސްމަހާމެހި ހިނިތުން ނުވަނީ ކީއްވެ ހެއްޔެވެ؟ ފާތުންނާއި ދިމާއަށް ބަލާލައިފައި މުޙައްމަދު ހިނިތުންވެލިއެވެ.

7- ހިނިތުންވުން

އަހަރެމެން ދުވާލުގެ ބުރަ މަސައްކަތަށްފަހު ގެޔަށް އަންނައިރު ގިނަދުވަސްދުވަހު ހުންނަނީ ވަރަށް ވަރުބަލިވެފައެވެ. ގޭތެރެއިން ކިރިޔާވެސް ހިތްހަމަނުޖެހޭކަމެއް ފެނިއްޖެނަމަ ހުރެވެނީ ރުޅި އާދެވި މޫނު ކުނިކުރެވިފައެވެ. އަނބިމީހާއަށް އޭގެ ވަރު ބާލާލެވެނީއެވެ. ތިމަންނާ ހެއްދެވުނީ ހުދުސިމެންތިން ހެން ހީވާކަހަލައެވެ. އަދި އަނބިމީހާ ހެއްދެވުނީ މަށީން ހެން ހީވާކަހަލައެވެ.

ކޮންމެދުވަހަކުވެސް ގެއަށް ވަންނައިރު ހިނިތުންވެހުރެ ވަންނާށެވެ. އަނބިމީހާއަށް ރީތި ނަމަކުން ގޮވާލައި ލޯބިވާކަން ބަޔާންކުރާށެވެ.

މިހާރު އަހަރެންނަށް މިވާހަކަ މާދިގުވާހެން ހީވާން ފަށައިފިއެވެ. ތިބާގެ އަނބިމީހާގެ ކައިރީގައި ހޭދަކުރައްވަން ޖެހޭވަގުތުކޮޅު މިވާހަކަ ކިޔަން ހޭދަވަނީއެވެ. އަހަރެންނަށް މާފުކުރައްވާށެވެ. ވީހާވެސް ކުރުކޮށްލެވޭތޯ ބަލާނަމެވެ.

މުޙައްމަދުގެ ދެމަފިރީންގެ ނައު ވަރަށް ހަލުވި ސްޕީޑެއްގައި ދުވެފައިދެއެވެ. ދަތުރުމަތީގައި ގާތްގަނޑަކަށް އަހަރެއްވުމާއި ގާތްވަނީއެވެ. މިއަދަކީ މުޙައްމަދާއި ފާތުންގެ ޙަޔާތުގައި އައި އެންމެ އުފާވެރި އެއްދުވަހެވެ. އެދެމަފިރީންނަށް ދަރިއަކުލިބުނީއެވެ. ދެމަފިރީން އެ ބޮޑު ނިޢުމަތް ދެއްވި ﷲ އަށް ޝުކުރުކުރިއެވެ.

8- ހަދިޔާ ބަދަލުކުރުން

ތިމާގެ އަހުލުވެރީންނަށް އެބައިމީހުން ޝައުޤުވެރިވާކަހަލަ ހަދިޔާ ގެނެސްދޭށެވެ. ހަދިޔާ ބަދަލުކުރުމަކީ ލޯބި އިތުރުވާ ކަމެކެވެ. ލޮބުވެތި ނަބިއްޔާ ޙަދީޘް ކުރެއްވިއެވެ. "ތިޔަބައިމީހުން (އެކަކު އަނެކަކަށް) ހަދިޔާ ބަދަލުކުރާށެވެ. އޭރުން ތިޔަބައިމީހުންގެ މެދުގައި ލޯބި އިތުރުވާނެއެވެ."

މުޙައްމަދުގެ ދެމަފިރީންނަށް ލިބުނު މިއުފަލުގައި އެދެމަފިރީންގެ ޢާއިލާއާއި ބައެއް ރަހުމަތްތެރީން ބައިވެރިވިއެވެ. އެތައްބަޔަކު އެ ދެމަފިރީންގެ ނަވަށް ޒިޔާރަތްކުރިއެވެ. ކަނޑު ގަދަވާން ފެށީ އެދުވަސްވަރުއެވެ. މޫސުން ގޯސްވާ އަތަށް އަޅަންފެށިއެވެ. އަދި ތޫފާންތައްވެސް ބޯމަތިވާން ފެށިއެވެ. ކަނޑުގެ ބާނިތައް ބޮޑުވެ، އެކަމުން ނަވަށް އެނގުންވާން ފަށައިފިއެވެ. އިސާހިތަކު ނައުގެ ހަލުވި ދުވެއްޔަށް އޭގެ އަސަރުކުރަން ފަށައިފިއެވެ.

9- ޢާއިލާގެ ގުޅުމަށް ބޭރުމީހުންގެ ނުފޫޒު ފޯރުވިޔަ ނުދޭށެވެ.

އާއިލާގެ ގުޅުމަށް ބުރޫއަރާކަހަލަ ވާހަކަދައްކާ މީހުންގެ ވާހަކަތަކަށް ބީރުކަންފަތެއް ދޭށެވެ. އެފަދަ މީހުންގެ ނުފޫޒު ޢާއިލާގެ ތެރެއަށް ފޯރުވިޔަ ނުދޭށެވެ. އެފަދަމީހުން ދެނެގަންނާށެވެ. އެކަހަލަމީހުން ވަރަށް ގިނައިން ދެމަފިރީންގެ ކިބައިގައި ހުންނަ ކުށްތައް ހާމަކުރަން މަސައްކަތް ކުރާނެއެވެ. ގޭތެރޭގެ އެކިކަންކަމަށް ފާޑު ކިޔާނެއެވެ.

މުޙައްމަދުގެ ނަވަށް ދިމާވެގެން މިއުޅެނީ މިކަހަލަ ގޮތެކެވެ. ބޭރުންއައި މެހުމާނުން ދެއްކި ބައެއް ވާހަކައިގެ ސަބަބުން އެދެމަފިރީންގެ ގުޅުމަށް ކުޑަކުޑަ ލޮޅުމެއް އެރީއެވެ. ނަމަވެސް އެދެމަފިރީން ވަރަށް ޙިކުމަތްތެރިކަމާއެކު އެމައްސަލަ ޙައްލުކުރިއެވެ. ދެމަފިރީންވެސް އެކަކު އަނެކާގެ ވާހަކަތައް ކަނުލައި އަޑުއެހިއެވެ.

10- ކަނުލައި އަޑުއަހާ މީހަކަށް ވާށެވެ.

ކަނުލައި އަޑުއެހުމަކީ މައްސަލަތައް ޙައްލުކުރުމުގައި އެންމެބޮޑަށް އެހީވެދޭ އެއްކަމެވެ. މީހުން ދައްކާ ވާހަކައަށް ޝައުޤުވެރިކަމާއެކު އަޑުއެހުމަކީ އެމީހުންގެ ލޯބި ލިބޭކަމެކެވެ. ދަރީންނާވެސް ގިނައިން ވާހަކަ ދައްކާށެވެ. އެކަމުގެ ސަބަބުން އެކުދީންނަށް ދިމާވެފައިހުންނަ އެކިއެކި މައްސަލަތައް އެނގޭނެއެވެ. ބުނަން ނުކެރި ހުންނަ ކަންކަންވެސް ކިޔައިދޭނެއެވެ. މީހަކު ވާހަކަދައްކާއިރު އެވާހަކަ ކުރިޔަށް ގެންދިޔުމަށްޓަކައި "އާދެ، އާދެ" ، "ދެން ކިހިނެއްވީ" ، ދެންކޮންތާކަށް ދިޔައީ" މިފަދަ ޢިބާރާތްތައް ބޭނުން ކުރާށެވެ. އޭރުން އަނެކާގެ ވާހަކަ އިތުރަށް ކުރިޔަށް ގެންދަން އޭނައަށް މަގުފަހުވާނެއެވެ.

މުޙައްމަދު، ފާތުންގެ ވާހަކަ އަޑުއަހަން އިނދެ އޮރެންޖެއްގެ ތޮށި ނޮޅާލިއެވެ. ފާތުންނަށް އޭގެން ފަޅިއެއް ދިއްކޮއްލިއެވެ. ނަމަވެސް ފާތުން އޭގައި ހިފުމަށް އިންކާރު ކުރިއެވެ. ދެން މުޙައްމަދު އޭގައި ހުރި އޮށްތައް ނަގާފައި އަނެއްކާވެސް ފާތުންއަށް ދިއްކޮލިއެވެ. ދިއްކޮއްލުމާއެކު ފާތުން ރުހުމުގައި، އޭގައި ހިފާ މީރުކޮށް އެއޮރެންޖު ފަޅި ކާލިއެވެ.

11- ދެމީހަކު ދޭތެރޭ މައްސަލައެއް ޖެހިއްޖެ ނަމަ އެ މައްސަލަ ޖެހުނުގޮތާއި ސަބަބު ދިރާސާ ކުރާށެވެ.

މި ޕޮއިންޓާއި ދެންބާކީހުރި ޕޮއިންޓުތަކަށް ﷲ އިރާދަކުރެއްވިއްޔާ މިވާހަކައިގެ ދެވަނަބައިގައި އަލި އަޅުވާލާނަމެވެ. ދެންހުރިބައިތަކުގެތެރޭގައި ( ޒުވާބުކުރުމާއި ރުޅިވެރިކަމާއި ޖަދަލުކުރުން ފަދަކަންކަމަށް އާއިލާ ތެރޭގައި ޖާގަ ނުދިނުން ) ، ( ފެންނަ މަޒަރުތަކަށް އަވަހަށް ޖަޖުމެންޓު ނުދިނުން ) ،( އާއިލާގެ މެމްބަރުންނާއިއެކު ވަޤުތު ހޭދަކުރުން ) . ( ތިމާއަށް ކުށެއް ކުރެވިއްޖެނަމަ އަވަހަށް ކުށަށް އިއުތިރާފުވެ މާފަށް އެދުން ) ، ( ކުށްތައް އިޞްލާޙު ކުރާނެ ބައެއް ޤަވާއިދުތައް ). މިފަދަ މުހިންމު ޕޮއިންޓުތައް ހިމަނާނަމެވެ.

އެކަމަކު ނިއްމާލުމުގެ ކުރީން ވަރަށް މުހިންމު އެއްޕޮއިންޓު ގެނެސް ދޭނަމެވެ.

މުޙައްމަދުގެ ނައު އަނެއްކާވެސް ކުރީގަ ދުވި ހަލުވި ސްޕީޑުގައި ދުވަންފަށައިފިއެވެ. ރޭގަނޑުގެ އަދިރިކަން އަލީގެ މައްޗަށް ގަދަވެގެންފިއެވެ. މުޙައްމަދު ނައުގެ ލައިޓުތައް ދިއްލިއެވެ. އެލައިޓުތަކުގެ ސަބަބުން އެނައުގެ ކައިރިން ދަތުރުކުރާ އެހެން އުޅަނދުފަހަރަށް ފަސޭހަވެގެން ދިޔައެވެ.

12- އެހެން މީހުންނަށް އެހީތެރިވާށެވެ

ތިމާގެ ޢާއިލާގެ މެންބަރުންނާއި އެހެނިހެން އާއިލާތަކުގެ މެންބަރުންނަށް އެހީތެރިވާށެވެ. އެހީތެރިވުމަކީ ދޭދޭ ފަރުދުންގެ މެދުގައިވާ ގުޅުންތައް ވަރުގަދަވާ ކަމެކެވެ.

މީހަކު ތުއްތުކުދީންނަށް ހިތްވަރުދިނުމާއި ޢަޒުމް ވަރުގަދަ ކުރުމާއި ކެރިގެން ކަންކަމާކުރިމަތިލުމަށް ކުޑަކުދީންނަށް ދަސްކޮށްދޭ ޕްރޮގުރާމެއް ހިންގިއެވެ. މި ޕްރޮގުރާމު ނިމުމުން ޕްރޮގުރާމުގައި ބައިވެރިވި ކުދީންނަށް މެޑެލްތައް ދިނެވެ.

ޓީޗަރު މީހާ މެޑެލްތައް ދީ މުޅި ޕްރޮގުރާމު ނިމުމުން އޭނަ ހުންނަ ހޮޓަލަށް ދިޔައެވެ. ނިދިނިދި އޮއްވައި ދޮރުގައި މީހަކު ޓަކިދިނެވެ. އޭނަގެ ހިތަށް އެރިއެވެ. މި ދަންވަރު އަނެއްކާ ކާކުބާއެވެ!

ދޮރު ހުޅުވާލިއިރު ފެނުނީ ޕްރޮގުރާމުގައި ބައިވެރިވި ތުއްތުކުއްޖެކެވެ. އެކުއްޖާގެ ކައިރީގައި އަދި އެހެން ތުއްތު އަންހެން ކުއްޖަކު ހުއްޓެވެ. އެ އަންހެންކުއްޖާއަށް ހުރީ ރޮވިފައެވެ. އެކުއްޖާ ގެއަށް ނުދާން ވެގެން އުޅޭތީވެ ޓީޗަރުގެ ކައިރިއަށް އައީއެވެ. ޓީޗަރު އޭނާގެ ކޮޓަރިއަށް އެދެކުދިން ވެއްދިއެވެ. ކުޑައިރުކޮޅަކުން ގެއަށް ދާނީ ކަމުގައި ޓީޗަރުމީހާ ބުންޏެވެ. އެތުއްތު އަންހެން ކުއްޖާ ގެއަށް ނުދާން އެއުޅެނީ އޭނަގެ ގޭގައި އުޅޭ ޢާއިލާގެ ފިރިހެނަކު އެތުއްތު އަންހެން ކުއްޖާއަށް ޖިންސީ ގޯނާ ކުރާތީކަމުގައި ޓީޗަރުގެ ކައިރީ ބުންޏެވެ. އެވާހަކަ އަޑުއަހާފައި ޓީޗަރު މީހާ އެކުއްޖާއަށް ހިތްވަރާއި ޢަޒުމް ވަރުގަދަ ކުރުމަށް ނަޞީޙަތްދިނެވެ. އެނަޞީޙަތުގެ ސަބަބުން އެ އަންހެންކުއްޖާއަށް ހިތްވަރު ލިބުނެވެ. އެހެން ކަމުން ފޯނު ނަގައި ވަރަށް ކެރިހުރެ އެ ނުބައި ފާޙިޝް ޢަމަލު ހިންގާ ބޭބެއަށް ގުޅިއެވެ. އެކުއްޖާ އޭނާގެ ބޭބެ ކައިރީ ބުންޏެވެ. " އަހަރެން މިއަންނަނީ ގެއަށް، ދެން އެކަހަލަ ޢަމަލެއް ހިންގަން ނޫޅޭތި، އުޅެފި ނަމަ ޖެހޭނީ މުޅި ޢުމުރު ޖަލުގަ ހޭދަކުރަން" ކެރިހުރެ އޭނަގެ ބޭބެއަށް އިންޒާރު ދިނެވެ. އަދި ފޯނު ބޭއްވިއެވެ. ދެކުދީންނަށް އުފަލުން ރޮވުނެވެ. އެފަދަ ހިތްވަރެއް ލިބުނީތީއެވެ. އަދި ޓީޗަރަށް ވަރަށް ޝުކުރު އަދާކުރިއެވެ. ކަރުގައި އޮތް މެޑެލްނަގައި ޓީޗަރު ކަރުގައި އެޅުވިއެވެ. މިވާހަކަތައް އަޑުއަހަން ހުރި ޓީޗަރުގެ އަނބިމީހާއަށް ހުރީ ޓީޗަރުފަދައިން ރޮވިފައެވެ. އަދި އޭނަގެ ފިރިމީހާގެ ކައިރީ ބުންޏެވެ. " ކަލާގެ ޢަމަލުތައް ހާދަ ގަބޫލުކުރަން އުނދަގުލެވެ. " ފިރިމީހާ ޖަވާބު ދިނެވެ. " އެފަދަ ހިތްވަރު ދިނުމުގެ ހުނަރު ހުރި ކޮންމެ މީހަކަށް ވެސް އެކުއްޖާއަށް އެހީ ވެވޭނެއެވެ." އަނބިމީހާ ޖަވާބުދިނެވެ. " އާއެކެވެ، އެހެން މީހުންގެ ގައިގާވެސް އެފަދަ ހުނަރު ހުރެދާނެއެވެ. އެކަމަކު ކަލާ އެހުނަރުގެ ބޭނުން ހިފައިފީމެވެ."

މުޙައްމަދުގެ ނައު ކަނޑުގައި ދަތުރު ކޮށްފައި ދެއެވެ. މިހާރު މުޙައްމަދު ތިބާއާ މުޚާތަބު ކުރަނީއެވެ. " އަހަރެންގެ މިވާހަކަ އަކީ ތާނަ އަކުރުތަކަކުން އަތުރާލެވިފައިވާ ވާހަކައެކެވެ. ވަކި ގޮތަކަށް އެއަކުރުތައް އަތުރާލުމުން ލަފްޒުތަކަކުން ޖުމްލަތަކަކަށް ބަދަލުވެ ތިބާއަށް އޭތި ވިސްނި ޢިބުރަތްލިބޭ ގޮތަށް އަތުރާލެވިފައި ވަނީއެވެ. މިވާހަކައިން ލިބުނު ޢިބުރަތްތައް މިއަދުން ފެށިގެންވެސް ތިބާގެ ކައިވެނީގެ ޙަޔާތުގައި ބޭނުން ކުރެވޭތޯ ބަލާށެވެ. ﷲ އިރާދަކުރެއްވިއްޔާ ތިބާގެ ކައިވެނީގެ ޙަޔާތުގެ ނައުވެސް ބާރު ސްޕީޑެއްގައި ހަލުވިކޮށް ދަތުރު ކުރާނެއެވެ.

އިތުރަށް ވިދާޅުވޭ...

ބީވެގެން ދިޔަ ލޯބިވާ ބުރުގާ

އަލްއަޚް މުޙައްމަދު ސިރުޙާން

ދޮންމަންޖެ ގެންގުޅޭ އަންނައުނުގެ ވަޒީފާއާ ރީތިވާ ސާމާނުތަކުގެ ވަޒީފާތައް ހުސްވުމުގެ ސަބަބުން އެވަޒިފާތަކަށް މުވައްޒަފުން ހޯދުމުގެ ގޮތުން އިއުލާނެއްކުރިއެވެ. އެ އިއުލާން ފެނުނު ވަރަށްގިނަ ވައްތަރުގެ ހެދުންތަކާއި ރީތިވާ ސާމާނުތައް ދޮންމަންޖެގެ އޮފީހަށް އިންޓަވިއުއަށް ޙާޒިރުވިއެވެ. އޭގެތެރޭގައި މޭކަޕްކުރުމަށް ބޭނުންކުރާ ލިޕްސްޓިކުން ފެށިގެން ދަތްއުނގުޅާ ބުރުސްވެސް ހިމެނެއެވެ. އިންޓަވިއުކުރި ހޯލު އިތުރަށް ޒީނަތްތެރިވެގެންދިޔައީ ތަފާތުވައްތަރުގެ ސެންޓުފުޅިތައް އެކިއުގެ ތެރެއަށް ވަނުމުންނެވެ. ހެދުމުގެ ވައްތަރުތަކުގެ ތެރޭގައި އެތެރޭންލާ ހެދުމާ ޖިންސުތަކާ ބަލާލި މީހަކަށް ރީތިކަމުންގޮސް ސިހުންގެނުވާ ތަފާތުވައްތަރުގެ ޓޮޕްކޮޅުތައް ވިއެވެ. އެސިހުން ބިރުވެރިކަމުން ޖޯކަކަށް ބަދަލުވީ 1400 އަހަރުގެ ސްޓައިލުގެ ބުރުގާއަކާއި ދޫހެދުމެއް އެތަނަށް ޙާޒިރުވީމައެވެ. އިންޓަވިއުގެ ގަޑި ކައިރިވަމުން ދިޔަވަރަކަށް ޙާޒިރީންގެ ހަށިގަނޑުގެ ތެރޭގައި ހާސްކަން އިތުވަމުންދިޔައެވެ.

އިންޓަވިއު ކުރަން ހަމަޖެހިފައިވާ ގަޑިއަށް އެތާހުރި ދޮރެއް ހުޅުވިއްޖެއެވެ. ދޮރުގެ ބިތްދޮށް ފަރާތުން ރަތްކުލައިގެ އައްޔެއް ފާޅުވިއެވެ. އަދި ފެންވަރާ މާގަނޑެއް ކަހަލަ އެއްޗެއްވެސް ފެންނަކަހަލައެވެ. ދޮރު ފަހަތަށް ލައްޕާލާފައި އެނުކުތީ ދޮންމަންޖެއެވެ. ވަރަށް ހިނުތުންވެފައި އިންޓަވިއުއަށް އައިސް ތިބި ކިއުއަށް ބަލާލިއެވެ. ހިނިތުންވެފައިވާ ތުން، ރުޅީގެ ތުމަކަށް ބަދަލުވީ ޒަމާނަށް ނުފެތޭ ސްޓައިލަކަށް ތިބި ބުރުގާއާ ދޫހެދުން ފެނުމުންނެވެ. އެ ދިގު ކިއުއިން ވެސް ދޮންމަންޖެ އަޅައިގަތީ އެ ދޭއްޗާއެވެ. ވާނީވެސް އެހެންތާއެވެ. މީހާ ރުޅިއަންނަ ނުވަތަ ލޯބިވާއެއްޗެއް ކިތަންމެ ދަތި ދޭތެރެއަކުންވެސް ލޮލުގައި އަޅައިގަނެއެވެ. ދޮންމަންޖެގެ ހަށިގަނޑުގެ ތެރޭގައި އުފެދުނު ރުޅިވެރިކަމުގެ ހުޅުގަޑުން ބޭރުވި ދުމުގެ އަސަރުތައް ބޭރަށް ނުކުމެދާނެތީ ވަރަށްބާރަށް ތުން ބާރުކޮށްލިއެވެ. ނަމަވެސް ދުންތައް ދެން ދިމާކޮށްލީ ދޮންމަންޖެގެ ލޮލާއެވެ. ރަތްވަމުންދިޔަ ދެލޮލުގެ ކަޅި ހުއްޓުނީ އެތާހުރި އިލޮށިފައްޗާދިމާއަށެވެ. ދުވެފައިގޮސް އިލޮށިފަތިނަގައި ބުރުގާއާ ދޫހެދުމާ ދިމާއަށް ދުއްވައިގެންފިއެވެ. ހަމަ މިހާރު މިތަނުން ނުކުންނާށެވެ. ތިކަހަލަ ވައްހާބީންނަކަށް މިތާގެ ޕިޔޯނުކަންވެސް ނުލިބޭނެއެވެ. ބުރުގާއާ ދޫހެދުން ކަރުއެލުވާލައިގެން ތިބެ އެތަނުން ނުކުމެއްޖެއެވެ. ކުޅިބަލަން ތިބި ޙާޒިރީން ތިބީ ބުނާނެއެއްޗެއްވެސް ނޭނގިފައެވެ. މިހާ ވަޒީފާގެ ބާރު ބޮޑުޒަމާނެއްކަމުން ބުރުގާމެންގެ ދިފާއުގައި އެއްވެސް ކަމެއްކުރާކަށް ނުކެރުނެވެ. ބުރުގާމެންދެބެން ދާދިދެންމެއަކު އުންމީދާއެކު އަޅަމުން އައި ފިޔަވަޅުތަކުގެ ހޫނުކަން ފިނި ކުރުވީ ނިކަމެތިކަމާއެކު ހިތާމައިން ދެބެންގެލޮލުން ނުކުންނަމުންދިޔަ ކަރުނަތަކެވެ. ދޮންމަންޖެގެ އޮފީހުގައި އުފެދުނު ރުޅވެރިކަމުގެ އަޑާއި ބުރުގާމެންދެބެންގެ ގިސްލިމުގެ އަޑު ކެނޑުނީ ދާދި އެކުއެކީގައެވެ. ދެބެންވެސް ހިނގަމުންދިޔައިރު ދޮންމަންޖެގެ އޮފީސް ފަހަތަށް ދަމުން ގެއްލެނީއެވެ. ހިތާމައިގެ އަސަރުތައްވެސް ދުރަށް ދަނީއެވެ. ބުރުގާ އިސް އުފުލާލާފައި ދޫހެދުމާދިމާއަށް ބުންޏެވެ. ދޮންމަންޖެ އެހުރީ ރާއްޖޭގައެވެ. އެކަމަކު ހިތް އެވަނީ ޔޫރަޕްގައެވެ. ހިތުގެ ނާރުތައް އެހުރީ ޔޫރަޕްގެ ފެޝަންތަކާ ދަޅުފޯނުހެން ގުޅިފައެވެ. އެމީހުން އެނާރުތަކަށް ގެނައި ހަރަކާތެއްގެ އަސަރުތައް މީޑިޔާމެދުވެރިކޮށް ރާއްޖޭގައި އިން ދޮންމަންޖެއާއިހަމައަށް އެހެރަ އަންނަނީ ހާދަހާވާ އަވަހަކަށެވެ. ބުރުގާ މިހެން ބުނެ އިސްދަށަށްޖަހާލިއެވެ. ދޮންމަންޖެއަށް ވިސްނޭނެނަމައެވެ. އަހަރެންނަށް ވަޒީފާ ލިބުނުނަމަ އޭނާގެ މަތިންއަންނަ ހުރިހާ ހަމަލާތަކާއި ދުރުރާސްތާ ޙަމަލާތަކުން އުފަލާ ތެދުވެރިކާއެކު އޭނާ ދިފާޢުކޮށްދިނީމުހެވެ. ދޫހެދުންވެސް ބުރުގާއާ ބައިވެރިވެލިއެވެ. އަހަރެންނަށް އޭނާގެ ވަޒީފާ ލިބުނުނަމަ އޮފީހުގެ ސިއްރުތައް ފިރިހެނުންގެ ލޯތަކުގެ ކުރިމައްޗަށް ފާޅުވެ ނީލަން ކިޔުނަކަ ނުދިނީމުހެވެ. ތެދުވެރިކަމާ އަމާނާތްތެރިކަމާއެކު ޙިމާޔަތްކޮށްދޭނަމެވެ. އެ ފިރިހެންވެރީން ތިބެނީ އަހަރެމެން ކަހަލަ ދޫހެދުންތަކަށް ވަޒީފާތައް ލިބިދާނެތީވެ ވަރަށް ބޮޑަށް ފާރަވެރިވެގެންނެވެ. އަހަރެމެން ދޮންމަންޖެ ކަހަލަ ޖިންސުންލަތީފުންގެ ލަދުވެތި ސިއްރުތައް އެމީހުންގެ ލޯމަތީން ފޮރުވާލަފާނެތީވެ އަހަރެމެންނަށް ތަފާތު ނަންނަން ކިޔާ މަލާމާތްކޮށް މުޖުތަމައުގައި ނަންހަޑިކުރެއެވެ. ދޮންމަންޖެގެ ވަޒީފާހޯދަން މިހާރުގޮސް އެތިބަ އެކަކަށްވެސް ދޮންމަންޖެއަށް އަންނަ ހަމަލާތަކެއް ޙިމާޔަތްކޮށެއް ނުދެވޭނެއެވެ. އެމީހުން މާބަލިކަށިވާނެއެވެ. އެކަމަކު ދޮންމަންޖެއަށް ހީވެފައި އެ އޮންނަނީ އެހެންގޮތަކަށެވެ. ދޮންމަންޖެއަށް ޙަޤީޤީ ކާމިޔާބު ލިބޭނީ ދޮންމަންޖެގެ އޮފީހުގެ ޤަވާއިދުތައް ﷲ ރުއްސަވާ ގޮތަށް ބަދަލުކޮށް ވަޒީފާ ދިނުމުގައިވެސް އެއިލާހު ރުއްސަވާ އުސޫލުތައް ގެންގުޅެ އަހަރެމެންކަހަލަ މީހުންނަށް ވަޒީފާ ދިނީމައެވެ. އެދެބެން މިކަލަހަ ވާހަކަތައް ދައްކަމުން ކުރިއަށް ދެއެވެ. ވަޒީފާއެއް ލިބޭތޯ ގޭގޭ ދޮރުތަކުގައި ޓަކިޖަހަމުން ކުރިއަށްދިޔައެވެ. އެއްވެސް ގެއަކުން ވަޒީފާދޭކަށް އެއްބަހެއްނުވެއެވެ. ދޫހެދުމަށް ވަޒީފާ ލިބުމުގެ ފުރުސަތު ގެއްލި އުއްމީދުވެސް ގެއްލިދިޔައީއެވެ. އެދިޔަގޮތަށް ގޮސް ވަނީ ދާރުލްއާސާރަށެވެ. އެތަނަކީ މުސްކުޅި އަދި ޒަމާންވީ އެއްޗެހި މީސްތަކުންނަށް ފެންނަފަށުގައި ބަހައްޓާފައި ހުންނަތަނެއްކަމުން، އެތާ އެލުވިގެން އަނގަމަޑުންލައިގެން މުސްކުޅި އެއްޗެހިތަކުގެ ތެރޭގައި އިނުމަށްޓަކައެވެ. އެކަމަކު ދޫހެދުން އިޚްތިޔާރުކުރީ ޒަމާނީ ޑައިވިން ސޫޓުގެކައިރިއެވެ. ދެޒަމާންވެސް ފެނިދާނެކަމުގެ އުންމީދުގައެވެ. އެތާހުރި ކޮނޑެއްގައި މާޔޫސްކަމާއިއެކު އެލުވިގެން އިނދެއްޖެއެވެ.
ބުރުގާ އުންމީދު ކަނޑާނުލާ ކުރިއަށް ދިޔައެވެ. މެދުޒިޔާރަތްމަގުން އިރަށް ހިނގަމުން ދިޔައެވެ. މުލިއާގެއާ ހަމަވުމުން އެގެއިން ފަހަރެއްގައި ވަޒީފާއެއް ލިބިދާނެކަމުގެ އުންމީދުގައި އެގޭ ދޮރުގައި ޓަކިދިނެވެ. ރައީސް ނަޝީދު ދޮރުހުޅުވާލިއެވެ. ހަމަ ބުރުގާފެނުމާ އެކު ބުރުގާގެ މޫނުމައްޗަށް ދޮރުޖެހިއެވެ. " ވައް ވައް ...." މިކަހަލަ އެއްޗެއް ކިޔަންފެށިހެން ހީވެއެވެ. ބުރުގާގެ ކުރިމަތީގައި ތަމްސީލުވެގެން ދިޔައީ މީގެ އަހަރުތަކެއްކުރީގެ މަންޒަރެކެވެ. ހަމަ މިގޮތަށް ވަޒީފާއެއް ލިބޭތޯ ތީމުގޭ ދޮރުގައި ޓަކިދިން ދުވަހެވެ. އެދުވަހު ދޮރުވެސް ނުހުޅުވައެވެ. ޓަކިދިނީ ބުރުގާކަން ވަގުތުން އެނގިއްޖެއެވެ. އެދުވަހު ތީމުގޭ ތެރޭން ރުޅިވެރިކަމާއެކު ލަވަންފެށި ހަޅޭކުގެ އަޑުކެނޑުނުތާ އަދިމިވީ އެންމެއަހަރެކެވެ. ފަހަރެއްގައި އެހަޅޭކުގެ އަޑު އިމުވުނު ދިވެހީން އެހަޅޭއްލެވިމީހާ މޮޔަވީކަމަށް ބަލާ ތަންކޮޅެއް މަތީހިސާބަކަށް ގެންދިޔައީކަން ނޭނގެއެވެ. އަޑު ނީވެނީ އެހެންވީމާ ކަންނޭނގެއެވެ. އެތަމްސީލީ މަންޒަރު ނިމުނުއިރު ބުރުގާއަށް ހުރެވުނީ ސިފައިންގެ ކުރިމަތީގައެވެ. ބަލާކަށް ނުހެރެ އެތެރެއަށް ދެމިގަތެވެ. އެތާތިބި ބައެއްޖިންސުންލަތީފުން ބުރުގާ ބަލައިގަތުމުން ބުރުގާގެ އުންމީދު އާވިއެވެ. ބުރުގާ މިއާވި އުންމީދާއެކު ދިޔައީ ބުރުގާގެ ފިހާރައަށެވެ. އެތެރެއަށް ވަދެ ބުރުގާގެ މަގާމުގައި އެލުވިގެން އިނދެއްޖެއެވެ. ދޮންމަންޖެ ފިހާރަކުރިމަތީން ހުރަސްކުރާނެ ވަގުތަކަށް އިންތިޒާރުގައެވެ.
ދޮންމަންޖެގެ އިންޓަވިއު ކުރިއަށްދަނީއެވެ. މޭކަޕުސާމާނަށް ވަރަށް ބޮޑުމުސާރައާއެކު ވަޒީފާލިބުނެވެ. ސެންޓުފުޅިތައްވެސް ހަމައެފަދައެވެ. އެތެރޭންލާ ހެދުންތަކަށް ހަމައެކަނި ވަޒީފާލިބުނީ ހަރުއެއްޗިއްސަށެވެ. އެމީހުންގެ ވަޒީފާއަކީ އެއޮފީހުގެ އެންމެއަގުބޮޑު ވަޒީފާއެވެ. މުސާރަވެސް ހަމައެހާބޮޑެވެ. އެވަޒީފާއަކީ އޮފީހުގެ އެންމެ އަގުބޮޑެތި އެއްޗެހި ރައްކާކުރާ ތިޖޫރީ ރައްކާތެރިކުރުމެވެ. ޓޮޕްކޮޅުތަކަށް ވަޒީފާލިބުމުގައި ކޮންމެވެސްވަރަކަށް ހުރަސްތަކެއް ކުރިމަތިވިއެވެ. ދޮންމަންޖެ، ޓޮޕްކޮޅު ވަޒީފާއަށް ކަމުދޭތޯ ހެޔޮވަރުކޮށްލަން ޓޮޕުކޮޅުލިއެވެ. އެތެރޭގެ ވަޒީފާއަދާކުރާ ހެދުމާއި ދޭތެރޭގައި މާގާތްކަމެއްނެތެވެ. ވައި ދަތުރުކުރެއެވެ. ކުޑަކޮށް ދޫކަމަށް ނިންމާ ވަޒީފާ ނުލިބޭނެކަމަށް ބުންޏެވެ. ޓޮޕްކޮޅު ދޮންމަންޖެގެ ހަންގަނޑާއި އެތެރޭން ލާފައިވާހެދުމާއި ދޭތެރޭން ވައިފޮދެއްވެސް ނުހިނގާވަރަށް ބާރުވެގަތެވެ. ދޮންމަންޖެ ލޯގަނޑު ކުރިމައްޗަށް ހުއްޓިލިއެވެ. މިހާރު ބަރާބަރަށް ދޮންމަންޖެގެ ހުރިހާވަނާތަށް ހާމަވެއެވެ. ޓޮޕްކޮޅަށް ދޮންމަންޖެގެ ވަޒީފާލިބުނީއެވެ. އަދި ޓޮޕްކޮޅާދޭތެރޭ ހިތްހަމަޖެހުނުލެއް ބޮޑުކަމުން ޓޮޕްކޮޅުކައިރީ އަހާލިއެވެ. ކަލޭތީ ލެކިއުޓުގެ ފެޝަންޝޯގައިބައިވެރިވި މީހެއްތޯއެވެ؟ އަހަރެންނަކީ ދޫކަމުންނާ ނިވާކަން ބޮޑުކަމުން އެތަނުން ބޭރުކޮށްލި މީހެކެވެ. ޓޮޕުކޮޅު ޖަވާބުދިނެވެ. ބެލް ހެޔޮވަރުކޮށްލިއިރު ބެލްގެ އަނގަމަތި ހީވީ ދޮން އާފަލެއްހެންނެވެ. އެފަދައިން ހުރި ޓޮޕްކޮޅުތަކަށާއި ބެލްތަކަށް ވަރަށް ބޮޑު މުސާރައާއެކު ވަޒީފާ ލިބުނެވެ.
އޮފީހުގެ މަސައްކަތް ކުރިއަށް ދާންފެށިއެވެ. މުވައްޒަފުން ހީވާގި ކޮށްލުމަށްޓަކައި ދޭތެރެދޭތެރެއިން ދޮވެހަދަންޖެހެއެވެ. އޮފީސް ހިނގަންފެށިތާ މާގިނަދުވަހެއްނުވެ، ވަރަށް ގަދައަށް ހިނގާ މަޝްހޫރު ކަން ހޯދިއެވެ. ފިރިހެން ވިޔަފާރިވެރީން އެ އޮފިސް ވަށާ މުގޯލިއަޅަންފެށިއެވެ. ހޯރައަޅާ ޒުވާނުންވެސް ވަކި މަދެއްނޫނެވެ. ކޮންމެމީހެއްގެ ވެސް ހިތުގެ ރާގަކީއެކައްޗެކެވެ. "މަށަށް މަށަށް" މިއެވެ. އެފަދައިން ދޮންމަންޖެ ކައިރިއަށް ޝެއަރ ހޯދުމަށް އަންނަމީހުން ޝެއަރ ނުލިބުނަސް ހިތްފުރިގެންދާފަހަރު އާދެއެވެ. ވާނީވެސް އެހެންތާއެވެ. ދޮންމަންޖެއަށް ބަލާލިއަސް އެއޮފީހުގެ ހުރިހާސިއްރުތައް ހާމަވެ ފާޅުވާންހުރެއެވެ.
ބުރުގާ އަދިވެސް ހަމަ ދޮންމަންޖެގެ އޮފީހުން ވަޒީފާ ލިބޭނެ ކަމުގެ އުންމީދު ކަނޑައެއްނުލައެވެ. ފާޅުގައި ބައެއްފަހަރު ދޮންމަންޖެގެ އޮފީހަށް ވަދެ ވަޒީފާ ލިބޭތޯސަލާންޖަހައެވެ. ކޮންމެފަހަރަކުވެސް އޮފީހުން ނިކުމެގެން ދާންޖެހެނީ އިލޮށިފަތީގެ ތަދު އިޙްސާސްކުރަމުންނެވެ. ބުރުގާ އިންނަފިހާރަ ކުރިމަތިން ދޮންމަންޖެ ދަންޏާ ބުރުގާއަށް އެއޮއްވާގޮތެކެވެ. ލަދުގަންނަ ގޮތަކަށް ހޫރިލާ ތުރުތުރު އަޅުވާލާ ބަނޑިބަނޑި ލައްވާލައެވެ. ދޮންމަންޖެއަށް ބުރުގާ ފެނިއްޖެނަމަ ރުޅީގެ މޫނުދައްކާލައެވެ. ތުން އަނބުރާލާފައި ބިންމަތީ ބާރުބާރަށް ފައިޖަހަމުން އަތުން ކުރުފަލި ޖަހަމުން ހިނގައިދާނެއެވެ. އެކަމަކުވެސް ބުރުގާގެ އުންމީދަކަށް ކުޑަވެސް ބަދަލެއްނާދެއެވެ.
ދޮންމަންޖެ ނިދާކޮޓަރިއާ ދިމާބޭރުގައި ދޮންމަންޖެގެ ނިދީގައި ލާ ނޭވާގެ އަޑުއަހާލުމަށް މަޑުކޮށްގެން ހުންނަ ފަހަރުވެސް މަދެއްނުވާނެއެވެ. އެހެން ހުންނައިރުވެސް ހުންނަނީ ވަޒީފާ ލިބޭތޯ ދުޢާކޮށްލަކޮށްލައެވެ. ބައެއްފަހަރު ދޮންމަންޖެ ނިދާ އެނދުދަށުގައި އޮވެ ދޮންމަންޖެ ގަދައަށް ނިދުމުން ނިކުމެ ދޮންމަންޖެގެ ބޯހިއްލާލައި އަމިއްލައަށް ދޮންމަންޖެގެ ބޮލުގައި އެޅުވިގެން އޮވެއެވެ. އަދި ބައެއްފަހަރު ލޯގަނޑުގެނެސް ފަރިބަލާލައެވެ. ހާދަހާރީއްޗެވެ. ހާދަހާވާ ލޯތްބެވެ. ދޮންމަންޖެ އެންމެ ފަހަރަކު އެމަންޒަރު ފެނުނުނަސް ވަގުތުން ބުރުގާއަށް ވަޒީފާ ދޭނެއެވެ. އެހެން އޮވެ ދޮންމަންޖެ ހޭލަން ކައިރިވާއިރަށް އަލަމާރިއަށް ވަދެ ހެދުންތަކުގެތެރޭގައި ފިލާ ބޮނދައެވެ. އެހެން އޮންނައިރު ދޮންމަންޖެލާ އެހެނިހެން އަންނައުނަށް ނަޞީޙަތްދީހަދައެވެ. ﷲ ރުއްސަވާގޮތަށް އުޅެ ދޮންމަންޖެއަށް އަންނަ ނުރައްކާތަކުން ސަލާމަތްކުރާނެގޮތް ކިޔައިދީހަދައެވެ. އެހާވަރުންވެސް ދޮންމަންޖެއަށް އެހީވާންބެނުންވެއެވެ.
އެއްދުވަހަކު ބުރުގާ އަލަމާރީގައި ފިލާ އޮއްވައި ފިރިހެނަކު ދޮންމަންޖެގެ ޝެއާރ ގަތުމަށް އަތުވެއްޖެއެވެ. އެމީހާ އަކީ ބުރުގާ ދެކެ ވަރަށް ރުޅިއަރާ މީހެކެވެ. ބުރުގާއަޅާ ކުދިންގެ ބުރުގާ ނަގުވައި ބުރުގާ ނުނަގާ ކުދީންނަށް މަލާމަތް ކޮށްހަދާމީހެކެވެ. ބުރުގާއަށް މިމީހާއަކީ ކާކުކަން ރަނގަޅަށް އެނގެއެވެ. ބުރުގާ އިނީ ދޮންމަންޖެ އެފިރިހެން މީހާގެ އޮފާރ ގަބޫލުކޮށްފާނެތީ ވަރަށް ބިރުންނެވެ. އެމީހާއަކީ ދޮންމަންޖެ ވަރަށް ހިތްކިޔާ މީހެއްކަމުން ވަގުތުން އެއޮފާރ ޤަބޫލުކުރިއެވެ. ދެމީހުން ގުޅުނުކަމުގެ އެއްވެސް ސެޓްފިކެޓެއް ނެތެވެ. ދެމީހުންގެ އެ އެއްބަސް ވުމަކީ ދީނީގޮތުންވެސް ހުއްދަނުވާކަހަލަ އެއްބަސްވުމެކެވެ. ދޮންމަންޖެ އޭނާގެ އޮފީހުގެ ހުރިހާ ސިއްރުތަކެއް ކިޔައިދެމުންދިޔައެވެ. ބުރުގާ އަށްވެސް އަދި ދޮންމަންޖެގެ ވަޒީފާގައިތިބި ހެދުންތަކަށްވެސް މިވާނުވާ އެބައެނގެއެވެ. އެމީހުންގެ ވަޒީފާ ގެއްލެން އުޅޭކަހަލައެވެ. އެހެދުންތަކަށް ރޮވެންފެށިއެވެ. ފައިބަމުން ދިޔަކަރުނަތަކުގެ ސަބަބުން ތެމިފޯވާން ފަށައިފިއެވެ. ބުރުގާ ބުނި ފަދައިން ދޮންމަންޖެގެ ގައިގައި ބާރަށް ހިފަހައްޓާން ފަށައިފިއެވެ. އެފިރިހެންމީހާ ދޮންމަންޖެއަށް ނުފޫޒު ފޯރުވަފާނެތީއެވެ. ނޫންނަމަ ދޮންމަންޖެ ވަރަށް ފުން އަނދަވަޅަކަށް ވެއްޓިދާނެއެވެ. ނަމަވެސް ކުރާނެކަމެއްނެތެވެ. ދޮންމަންޖެގެ މުޅި އޮފީހުގައި އެނުލަފާ ފިރިހެންމީހާގެ މަކަރުވެރި ވަކިތައް ވާ އަތްގަދަކުރީއެވެ. ހެދުންތަން ވަރަށް ބާރުދެއްކިއެވެ. ނަމަވެސް އެފިރިހެންމީހާ މާބާރުގަދައެވެ. ފަހަރަކު ހެދުމެއްގެ ވަޒީފާގެއްލި މަޑުމަޑުން ހުރިހާ ސިއްރެއް ކަޝްފުވަމުންގޮސް އެކީ ހާމަވީއެވެ. ދޮންމަންޖެގެ ހޭވެރިކަން ދިޔައީއެވެ. އެނުބައިނުލަފާ ފިރިހެންމީހާގެ މަކަރުވެރި ރޭވުންތަކުން ތިޖޫރީ ހިމާޔަތްކުރަން ހުރި ވަރުގަދަ ހެދުންވެސް ފަސޭހަކަމާއެކު ބަލިކޮށް ދޮންމަންޖެ ފޮރުވާފައިވާ އަގުބޮޑު ޚަޒާނާތައް ފޭރިގަތީއެވެ. ތިޖޫރީއަށް ވައިރަސް ފޯރުކުރެވިއްޖެކަމަށް ބަލައި ފިލާރައްކާވެއްޖެއެވެ. ފިލާއިން
ބުރުގާ ގިސްލަގިސްލާފައި ރޮނީއެވެ. އެގިސްލުމަކަށް ބުރުގާއަކަށް ބާރެއްނުފޯރުވުނެވެ. އެހެންހުރިހާ އަންނައުނެއްވެސް އެގިސްލިމުގައި ބައިވެރިވިއެވެ.
ދޮންމަންޖެ ހޭވެރިކަންވީ ޖެހިގެންއައިދުވަހު ހެދުނެވެ. ކުއްލިއަކަށްތެދުވެ ޕާޓުނަރު ކޮބައިތޯބަލާލިއެވެ. ޖެހުނުތާ ލަކުނުވެސްނެތެވެ. އޮފީސް ހުރީ ހުޅުވާ އަޅާފައެވެ. ދޮންމަންޖެއަށް ގިސްލެވެންފެށިއެވެ. ފަހަރަކަށްވުރެ ފަހަރެއް ގަދަވަމުންގޮސް ހޯސްލާފައި ކަރުނަތައް އޮހިގަތެވެ. އެހާލުގައިވެސް އަވަސްއަވަހަށް ވަޒީފާގައިތިބި ހެދުންތައް ފެނޭތޯބެލިއެވެ. ހެދުންތައް ތިބީ އެކަތިމައްޗަށް އަނެކަތި އަރާ ބިއްމަތީ ގުޅަވެށިފައެވެ. ހެދުންތައްވެސް ގިސްލަގިސްލާ ރޮނީއެވެ. ދޮންމަންޖެގެ ޢިއްފަތްތެރިކަން ފޭރިގަތީއެވެ. އުމުރުދުވަހު ރައްކާކޮށްގެން ގެންގުޅުނު ޚަޒާނާތައް ފޭރިގަތީއެވެ. ދުނިޔެއަށް ބޭކާރުވީއެވެ. މުޅިދުނިޔެ މަލާމާތްކުރާހެންވެސް ހީވެއެވެ. މީހާގެ ވަށައިގެން އަނދިރިވާހެންވެސް ހީވެއެވެ. ބުރުގާ އަކަށް އެތަންބަލާކަށް ކެތެއްނުކުރެވުނެވެ. ދުވެފައިގޮސް ދޮންމަންޖެގެ ކަރުނަތައް ފޮހެދޭންފެށިއެވެ. ލޯތްބާ އެކު ނަޞީޙަތްދޭންފެށިއެވެ. ﷲގެ ޙަޟުރަތުން އުއްމީދުކަނޑާނުލުމަށާއި ތައުބާވެ އަލުން ދުނިޔޭގެ ޙަޔާތް ފެށުމަށް ހިތްވަރުދިނެވެ. ﷲ އީ އަޅުތަކުންނަށް ކުރެވޭފާފަތައް ފުއްސަވައިދެއްވަވާ އިލާހުކަން އިހްސާސްކޮށްދިނެވެ. ވަރަށް ހިތްވަރުދިނެވެ. ދޮންމަންޖެ ބޭއިޚްތިޔާރުގައި ބުރުގާނަގާ މޫނުމަތީ ބޮނޑިކޮށްލިއެވެ. ލޮލުން ފައިބަމުންދިޔަ ކަރުނަތައް ހުސްވެގެންދިޔައީ ބުރުގާގެ އެތެރެއަށެވެ. މޫނުމަތިން ބުރުގާނަގައި ބޮލުގައި އަޅާލިއެވެ. ދޮންމަންޖެގެ ހިތުގައި އުންމީދުގެ އަލިކަން ފާޅުވާންފެށިއެވެ. ދެން މިއަށްފަހު ﷲ ރުއްސަވާމަގުގައި ނޫނީ އެއްވެސް ފިޔަވަޅެއްނޭޅުމަށް ޢަޒުމްކަނޑައެޅިއެވެ. ދުވެފައިގޮސް ހުއްޓުނީ ލޯގަނޑު ކުރިމައްޗަށެވެ. ބުރުގާ އިނީ ލޯތްބާއި ކުލުނާއެކު ދޮންމަންޖެގެ ބުރަކަށީގައި ފިރުމާލަފިރުމާލައެވެ. ދޮންމަންޖެގެ ސޫރަ ފެނުނީ މުޅީން އެހެންގޮތަކަށެވެ. މިހުރެވުނީއެހެން ދުނިޔެއެއްގައެވެ. ދޮންމަންޖެގެ ރީތިކަން އިތުރުކުރުވީ ދޮންމަންޖެދެކެ ޙަޤީޤަތުގައިވެސް ލޯބިވާ ބުރުގާއެވެ. ހާދަހާވާލޯތްބެވެ. އުފަލުންގޮސް ބުރުގާގައި އޮޅުލައިގަނެވުނެވެ. އެތާ އަމިއްލަ ސޫރައަށް ބަލަން އެތައްއިރަކު ހުރެވުނެވެ. ބުރުގާގެ ދެބެންނަށް ކުރީން ހެދުނުގޮތް ހިތަށް އަރާ ލަދުގަންނަގޮތްވިއެވެ. އެދުވަހުވެސް ބުރުގާމެންގެ އުސޫލުތަކަށް ތަބާވެވުނުނަމަ މިދިމާވި ކަންކަން ދިމާނުވީހެވެ. ދޮންމަންޖެއަށް ﷲގެ އޯގާވަންތަކަން ހިތްމައްޗަށްގެނެވުނެވެ. އެއިލާހަށް ޝުކުރުއަދާކުރިއެވެ. ދެންދުވަހަކުވެސް ކުރީން އުޅުނު ހަޔާތަށް އެނބުރި ނުދިއުމަށް ޢަޒުމްކަނޑައެޅިއެވެ. ކުޑައިރުކޮޅެއްފަހުން ފެންވަރައި ތާހިރުވުމަށްޓަކައި ފާޚާނާއަށް ވަނުމަށް ބުރުގާ ނަގައި ވަރަށްލޯތްބާއެކު އެނދުމަތީ ބާއްވާލިއެވެ. ދޮންމަންޖެ ފާޚާނާއަށް ވަނުމުން ބުރުގާ ދުވެފައި ދިޔައީ ދާރުލްއާސާރަށެވެ. ބުރުގާގެ ޕާޓުނަރުބަލައެވެ. ކަންހިނގިގޮތް ކިޔާދިނުމުން ދޫހެދުން ވަރަށް ދެރަވިއެވެ. އަދި އުފާވީ ދެބެންނަށްވެސް ވަޒީފާ ލިބުމުންނެވެ. ދެބެން އައިސް ދޮންމަންޖެ ފާޚާނާއިން ނުކުތުމުގެ އިންތިޒާރުގައި ތިބީ އެދުމަތީ އޮށޯވެލައިގެންނެވެ. ފާޚާނާއިން ނުކުތުމުން އުފަލާއެކު މަރުޙަބާކީ ބުރުގާއާއި ދޫހެދުމެވެ. ދޮންމަންޖެވެސް ވަރަށް އުފާވިއެވެ. މުޅިންއެހެން ޙަޔާތަކަށް އިރުއެރީއެވެ. ދޮންމަންޖެ ރީތިވެ ދޫހެދުންލައި ބުރުގާއަޅާލިއެވެ. ދޮންމަންޖެގެ އެއްވެސް މުވައްޒަފެއްގެ ވަޒީފާއެއް ނުގެއްލެއެވެ. ދޮންމަންޖެގެ މަންމަ މީގެ އަހަރުތަކެއްކުރީން ޙައްޖުން ގެނެސްދިން މުސައްލަނަގައި ޤިބުލައަށްވާގޮތަށް އަޅާލިއެވެ. އެދުވަހު ފާއިތުވި ފަތިސްނަމާދު ކުރީއެވެ. ދުވަހަކުވެސް ނުލިބޭ ހިތްހަމަޖެހުން ލިބިގެން ދިޔައެވެ. ދޮންމަންޖެ ހިތަށްއެރިއެވެ. މީ ހާދައުފާވެރި ޙަޔާތެކެވެ. ﷲ އީ އެންމެ އޯގާވަންތައިލާހެވެ. އެއިލާހު އެންގެވި ގޮތަށް އުޅުމުން ހާދަހާހިތްހަމަޖެހެއެވެ.
އެގޮތުގައި ދުވަސްތައް ވޭތުވަމުންދެއެވެ. އެއްދުވަހަކު ދޮންމަންޖެ ކައިގެން ކުޑައިރުކޮޅެއް ވީތަނާ ވަރަށް ގިނައިން ހޮޑުލެވެންފެށުނެވެ. ހިތަށް ބިރުވެރިކަންވަނެވެ. އަދި އިތުރަށް ބިރުގަތީ އެދުވަހު އެއުޅުނު ޕާޓުނަރު މަތިންހިތަށް އަރާފައެވެ. އޭނައަކީ އެތައް އަންހެނުންނާއެކު ޖިންސީގުޅުން ހިންގަމުން ދުވާމީހެކެވެ. ފަހަރެއްގައި އޭނާގެ ގައިގާ އެއިޑްސްގެ ވައިރަސް ހުރެ ދޮންމަންޖެގެ ހަށިގަނޑަށް އެވައިރަސް ވާރުތަކޮށްފާނެތީއެވެ. ނަމަވެސް ﷲގެ ޙަޟްރަތުން އުންމީދު ކަނޑައެއްނުލައެވެ. ބުރުގާބުންޏެވެ. އެއިލާހަށް ދުޢާކުރާށެވެ. އަދި ހެޔޮގޮތަށް އުއްމީދުކުރާށެވެ. އިރާދަކުރެއްވިއްޔާ ހުރިހާކަމެއްވެސް ރަނގަޅުވާނެއެވެ. ބުރުގާދިން ނަޞީޙަތުގައިހިފާ ދޮންމަންޖެ ޓެސްޓުކުރުމަށް ހޮސްޕިޓަލަށް ދިޔައެވެ. ޙަމްދު ހުރީ ﷲ އަށެވެ. ދޮންމަންޖެގެ ގައިގާ އެނުބައި ނުލަފާ ފިރިހެންމީހާގެ އެއްވެސް އަސަރެއްނެތެވެ. އެއިޑްސްގެ ބިރުވެރިކަންވެސް ފިލާދިޔައީއެވެ. މިހާރު ދޮންމަންޖެއަކީ ވަރަށް ސާލިޙު ރަނގު މީހެއްގެ އަންބެކެވެ. ދެކުދީންގެ މަންމައެކެވެ. ދޮންމަންޖެގެ ދުޢާއަކީ ދެމަފިރީން، އެ ދެކުދީންނާއެކު ސުވަރުގޭގައިވުމެވެ. ﷲގެ ރަޙްމަތަށް ދިޔުމެވެ. ބުރުގާ މިހާރު ތިބާޔާ އެމުޚާތަބުކުރަނީއެވެ. އަހަރެން ދޮންމަންޖެއަށް ދިމާވި މިޙާދިސާ ތިބާއަށް މިކަޝްފުކުރީއެވެ، ކަޝްފު ކުރެވިގެންވާ ކޮންމެއެއްޗަކުންވެސް މީހުން ފައިދާ ހާސިލްކުރެއެވެ. ތިބާވެސް ކަޝްފުކުރެވިގެންވާ މިޙާދިސާއިން ފައިދާ ލިބިގަންނާށެވެ.

އިތުރަށް ވިދާޅުވޭ...